یاشاسین بو ائلین مرد اوغوللاری!
بسم الله الرحمن الرحیم
یاشاسین بو ائلین مرد اوغوللاری!
گونلرین بیر گونو بابک قالاسینداکی ییغیناجاغین فیلمینه باخیردیم؛ اردبیل اوشاقلارینین گؤرتوروب و گتیردیيی فیلمه. دئییردیم گؤروم نه خبر!؟! دئییلن‌لرین هانکی‌سی دوزدور؛ او طرف دئیه‌ن یا بو طرف دئیه‌ن. باخدیغیم فیلملرین مؤحتواسی بیر یانا٬ آنجاق اوزوندن صداقت یاغیردی. اما فیلمین مؤحتواسیندا هر ایکی طرفین سؤزلرینه صيدق ائده‌ن منظره‌لر و لحظه‌لر گؤردوم. ائله‌سینى گؤردوم کی نه آذربایجان´ی تانییاندیر و نه آنادیلینین حؤرمتین قانان، آنجاق چالیب اویناماق و اونا تای ایشلرینه یئر آختاریرمیش!. ائله‌سینى گؤردوم آذربایجان´ین دردلرینى دوشونوب لاکين چالیب اویانایانلارا و اونلارا تای خاصيیت‌سیز قوشون قارالتیسينا سئوینیب و گووه‌نیر؛ گومان ائدیر اونلاردان بونلارا یارـ یولداش چیخابیله ر. آمما بو جمعین ایچینده اوغوللار دا گؤردوم کی شيددتلی زورنا ـ بالابان سسی٬ کی چوخو حاکيميیت طرفیند‌ن یاییلیردی٬ اونلاری اؤزونه مشغول ائتمه‌یییب. بو اوغوللار میللت‌لرینین ناله و سیزیلتیلارینى هرزه سسلرین موقابيلینده اونوتمامیشلار!
بو سسلرین هامی‌سیندان گوجلو بیر پيلاکارد گؤردوم بئله یازیلمیشدی: «هانی بو ائلین مرد اوغوللاری!؟!» اؤز اؤزومه دئدیم ناگران اولما قارداشیم؛ بیزیک بو ائلین مرد اوغوللاری! چوخ زامانلاردان سونرا اردبیل´ین قاراباغ مسجیدینین حماسه‌سیندن سونرا «یاشیل موغان» قزئتینه بیر رجز یازمالىیدیم٬ نئیه کی قارداش یاخشی دئمیش «بیز ازیله ـ ازیله اوجالابیله‌ریک؛ بيزى دؤیه‌نلر آلچالاجاقلار!» رجزین عونوانینا بیر سؤز یازدیم کی قالاداکی یازی‌یا (پيلاکاردا) جاواب وئرمیش اولا. یازدیم «بیزیک بو ائلین مرد اوغوللاری!» آمما بوگون او زامان‌کی آزادلیق یوخدور. نه قالایا پيلاکارد آپارماق آسان‌دیر، نه ده قزئت‌لرده رجز یازماق. آلللاهین سایتینى دا بیزیم اوزوموزه باغلاییب‌لارּ
آمما اوره‌ییم دئییر بیزیم حرکتیمیز سورعت‌له اينکيشاف ائدیب. نيیه دؤرد ایل بوندان قاباق سایتلاری باغلامیردیلار!؟ نيیه قزئت‌لری بوگونکو تکین سیخینتی‌یا سالمیردیلار؟! بو نيیه‌لر بیر طرفدن و آذربایجان´ین ایگید اوغوللاری‌نین سئچگی کاندیدالارینا گتیردیيی فيشارلار و اونلاری غئیر-ى فارس ميللت‌لرین حاققیندا دانیشدیرماق- کی او جومله‌دن دوکتور معین´ی تبریز´ده ادب ائتمک، حجت‌الاسلام کروبی´دن 15ـ نجی اصلین ايجراسینین سؤزونو آلماق و اونو بو باره‌ده جيددی شکیلده دانیشدیرماق- بونلار دا بیر طرفدن هامیسی اومودلار یارادیرلار. بو سیخینتی‌لارین چوخالماسی و بو سؤزلرین (15ـ نجی اصلین ايجراسی) یالنیز آغیزا گتیریلیب دئییلمه‌سی بیزیم اوجالماغیمیزین یولوندا موهيم علامت ساییلابیله‌ر.
آمما سون سؤزو یئنه ده اؤزوموز دئمه‌لی‌ییک، نئجه کی بو زامانا قده ر فداکارانه موباريزه‌لریمیزدن جاواب آلمیشیق٬ گله‌جکده ده اوخ کیمی دوشمانلارین اوره‌یینه تاخیلمالی‌ییق. هر بیر حماسی ایش یالنیز بئش نفرین حوضوری ایله ده گؤرولسه٬ بومبا کیمی آچیلیب بونلارین یوخولارینى پریشان ائده‌جک. بونلار بیزدن بئله قورخورلار کی سویون دامجیلتی سسیند‌ن گئجه‌نی صوبحه تک یاتانماییرلارּ دئییرلر بس کی بیزیم آیاقلاریمیزین سسی‌دیر٬ نيیه کی بیلیرلر بیز یولداییق، بونلاری موحاصيره ائتمیشیک. داها بوگون دئیه‌نمیره‌م هانی بو ائلین مرد اوغوللارى٬ نييه کی مرد اوغوللار دوکتر معین´ین ایکی اوزلو سؤزلرینه جاواب وئره‌نده اؤزلرینى گؤسته ردیلر. مرد اوغوللار بعضی ميللت‌لرین خطا گئتدیيی یولدان اوزاق گزدیلر و معین کیمی‌لره و لاریجانی کیمی‌لره یوخ جاوابی وئردیلر. ایندی یالنیز آذربایجان اوغوللارینا بیر سؤز دئمک اولار: «یاشاسین بو ائلین مرد اوغوللاری»!
والسلام علیکم و رحمة‌الله
عبدالعزیز عظیمی قدیم
قوم شهری
0 Comments:
Post a Comment
<< Home