حجة الاسلام عظیمی´نین توتقولانماسی و بیزیم سوکوتوموز.

حسن ارک
بو ایل مشروطه بایرام تؤره نینده حجة الاسلام عظیمی قدیمی´نین ایشتيراکی آذربایجان میللی حرکتینه دینی و مذهبی ائعتيبار و مشروعيیت باغیشلادی. گؤردویوموز کیمی باقیرخان مزاری اوزه رینده آذربایجانین باشی اوجا و جسارتلی روحانی اوغلو باشقا چالیشانلار و ضیيالیلارلا بیرینجی سیرادا قرار تاپیب و آذربایجانچیلاری مراسیمده ایشتراک ائتمک اوچون توپلاماقدان هئچ چکینمه دی.

عظیمی حضرتلرینین بو ایشی آذربایجانچیلار اوچون نئچه یؤندن اؤنه ملیدیر:

1- دئموکراتلیق آذربایجانچیلارین بیر دانیلماز اؤزه للیيیدیر. چونکو بیر روحانینی بیر توپلانتینین باشچیلاریندان ائتمک دئموکراتچیلیغی ساده جه سؤزده یوخ بلکه ده عملده گؤسته ردی.

2-آقا-يی عظیمی´نین، آذربایجانچیلار ایچه ریسینده روحانی گئییمی ایله ایشتيراکی دینسیزلیک و آتئیيست دامغالارینی آذربایجانچیلاردان سلب ائتدی. آمما تاسسوفلر اولسون کي پهلوی ده قالميش شووئنیستی فیکیرلری داشيیانلار بئله بیر عظمتلی یغینجاغدا عظیمی و اونون یولداشلاریلا قارشی دایانیب و آذربایجان میللی حرکتین غئیرتلی روحانی اوغلونو توتقولاییب و دوستاقلادیلار.

عینادچیلارین بو ایشی نئچه باخيمدان اؤنه ملیدیر:

1- حاج آقا عظیمی´نین دوستاقلانماسی بونو گؤسته ریر کی شووئنیستلر آذربایجان میللی حرکتینين دینسیز اولماسی یوخ، بلکه دینی اولماسی قورخودور. نییه کی اگر آذربایجان میللی حرکتین دینسیز فرض ائتمیش اولاق شووئنیستلر دوشونور کی روحانیلرین میللی حرکته قاريشماسی میللی حرکتی گوجله ندیریر و دینیله شدیریر و شووئنیستلر آذربایجان میللی حرکتین دینسیزلیيینده یوخ بلکه دینیله شمه سیندن قوخورلار.

2- حاج آقا عظیمی´نی دوستاقلاماق و اونو آذربایجان میللی حرکتیندن آییرماق بیر دینی حؤکومت فرمانلاریلا عمله گئچیر و بو گؤسته ریر کی آذربایجان میللی حرکتی ایله موباریزه ده روحانیلره ده رحم ائتمک یوخدور. بئله بیر آکسيیونلار قارشیسیندا آذربایجانلی روحانیلر آرتیق دوشونمه لیدیرلر. نه اولور کی بیر روحانی اؤز دوغال حاقلارینی دوشونوب حيمایه اوچون چالیشاندا بیر آندا دوشمانا چئویریلیر، آیا ايسلام دینینده تورک´ه قارشیلیق وارمی؟

3- بیزیم عنعنه لریمزه گؤره بیر شهید مزاری اوسته مذهبی دانیشیق ثواب و موستحب ایشدیر آمما شووئنیستلرین یاراتدیغی حسساسیيتلره گؤره و بو کیچیک چالیشقانین حسساسیيتی دوشونوب و حاج آغادان سوکوت تمنناسی اوچون حاج آقا عظیمی مذهبی دانیشیقلاریندان واز کئچدی.

شووئنيستلر بو مراسیمده توتقولانانلارین هامیسينی بوراخیب تکجه حجة الاسلام عظیمی´نی دوستاقدا ساخلاییبلار و بونو گؤسته ریر کی میللی حرکتین قارشیسیندا دایانان قوووه لر مدنی- مذهبی چالیشانلاردان چکینیب آمما ايفراطی چالیشانلاری حيمایه ائدیر و اونلاری ساده جه بیر سورغو- جاوابدان سونرا بوراخیر.

4-حجة الاسلام عظیمی بوگونو میللی حرکته و صادیق فععاللار ایچه ریسینده اؤزونو یاخشی یئر قازانیب و او اوچون باسقیچیلار اونو شخصيیتین تئرور ائتمک ایسته يیرلر و چيرکین تبلیغلر، عاغیللی دوشمان و نادان دوست طرفیندن یایینلانیر. بیزلرده دیر کی بو توطئه دن اورتوک گؤتوروب و اونون بوراخیلماسینا دک چالیشاق.

دوشمان ایستير بیزی بیربیریمیزیله قارشی قویوب اؤز آماجینا ال تاپسین. بوگون ایختيلافلاری قیراغا قویوب بیرله شمه میز لازیمدیر.

5-بؤیله سینه من اؤز نیفرتیمی عظیمی حضرتلرینین دوستاقلانماسیندان بیلدیریب، اونون آزاد اولماسینی ایسلام جومهوریيتینین باشچیلاریندان ایستیره م. آرتیرمالییام کی آذربایجان مساله لرین حل ائتمه سی اوچون دوستلوق و موثبت باخیشلار ایسلام جومهوریتینین دؤولت مردلریندن لازیمدیر.

---